එහිදී නාවික සම්ප්‍රදායානුකූල චාරිත්‍ර අනුව නාවික හමුදාව විසින් එම නෞකාව පිළිගන්නා ලදී. 

නෞකාවේ අණදෙන නිලධාරී වශයෙන්, කපිතාන් (මාලිමා) නිශාන්ත අමරෝසා කටයුතු කරනු ලබන අතර, නිලධාරීන් 18 දෙනෙකුගෙන් සහ නාවිකයන් 100 දෙනෙකුගෙන් එහි නැව් මුළුව සමන්විත වේ. 

තවද, නාවික හමුදා මූලස්ථානය සහ බටහිර නාවික විධානය නි‍යෝජනය කරමින් ජ්‍යෙෂ්ඨ නිලධාරීන් රැසක් ද එම අවස්ථාව සඳහා එක් වී සිටියහ. 

ඉන් අනතුරුව, නාවික හමුදාධිපති, වයිස් අද්මිරාල් රවීන්ද්‍ර විජේගුණරත්න ද නෞකාවේ නිරීක්ෂණ චාරිකාවාරයක නිරත විය.

එහිදී, නෞකාවේ ක්‍රියාකාරීත්වය, මෙහෙයුම් සූදානම සහ සැකැස්ම පිළිබඳව නාවික හමුදාධිපතිතුමන්ගේ නිරීක්ෂණයට ලක් විය. 

මෙම නෞකාව අගෝස්තු මස 02 වන දින කොළඹ වරාය පරිශ්‍රයේදී, සන්නද්ධ හමුදා සේනාධිනායක, අතිගරු ජනාධිපති මෛත්‍රීපාල සිරිසේන මැතිතුමා අතින් ශ්‍රී ලංකා නාවික නෞකා සයුරළ වශයෙන් අධිකාරියට පත් කිරීමට ද නියමිතව ඇත. 

නවීන යුද නෞකාවක් වන මෙය ශ්‍රී ලංකා නාවික හමුදා 67 වසරක ඉතිහාසයේ ප්‍රථම වරට අලුතින්ම මිලදී ගත් ප්‍රථම අධි තාක්ෂණික නෞකාව ලෙස සනිටුහන් වනු ඇත.

එමෙන්ම ඉන්දියාව විසින් විදේශ නාවික හමුදාවක් වෙත නිශ්පාදනය කරන ලද විශාලතම යුධ නෞකාව ලෙසද මෙය වාර්තාගත වේ.

තවද, නෞකාවේ මෙහෙයුම් සහ යාත්‍රා හැකියාව පරීක්ෂා කරනු වස් එය මෙරට බලා යාත්‍රා කිරීමට ප්‍රථමයෙන් පරීක්ෂක ගමන්වාර සහ අත්හදාබැලීම් කිහිපයක් සිදු කර ඇත. 

2014 වර්ෂයේ පෙබරවාරි මස 17 වන දින මෙම වර්ගයේ නෞකා 2 ක් ඉදිකිරීම සඳහා ‍ඉන්දියාවේ ගොවා නැව් සමාගම සමග ශ්‍රී ලංකා නාවික හමුදාව ගිවිසුමකට අත්සන් තබන ලද අතර, එහි ප්‍රතිඵලයක් ලෙස, මෙම ප්‍රථම නෞකාව නිෂ්පාදනය කිරීමේ කාර්යයන් ආරම්භ විය.

ඒ අනුව, එහි ඉදිකිරීම් කටයුතු 2014 මැයි මස 15 වන දින ආරම්භ කළ අතර, නෞකා අංගනය තුළ සිදු කරනු ලබන නැව් පතුල ඉදිකිරීම් කටයුතු (Keel Laying) 2014 සැප්තැම්බර් මස 10 වන දින සිට සිදු කෙරිණි.

2016 ජුනි මස 10 වන දින මෙම නෞකාව දියත් කිරීම උත්සවාකාරයෙන් සිදු කරන ලදී. 

එමෙන්ම, පසුගිය ජූලි 22 වන දින මෙම නෞකාව නිල වශයෙන් නාවික හමුදාවට භාර දීමේ උත්සවය, ඉන්දියාවේ ශ්‍රි ලංකා මහ කොමසාරිස්වරිය ලෙස කටයුතු කරන අතිගරු චිත්‍රාංගනි වාගිෂ්වරගේ ප්‍රධානත්වයෙන් ඉන්දියාවේ ගෝවා නැව් තඨාකංගනයේදී සිදු කෙරුණි.

එහිදී නාවික හමුදා මාණ්ඩලික ප්‍රධානී රියර් අද්මිරාල් සිරිමෙවන් රණසිංහ විසින් නිල වශයෙන් නෞකාව භාර ගන්නා ලදී.

තවද, ශ්‍රී ලංකා නාවික හමුදාව වෙනුවෙන් නිෂ්පාදනය කරනු ලබන දෙවන අධි තාක්ෂණික නෞකාව 2018 වර්ෂයේදී ශ්‍රී ලංකාවට රැගෙන ඒමට ද නියමිතය. 

(නාවික හමුදා මාධ්‍ය ඒකකය)