ජනතාව නොමඟ යවන සුළු හේතු පාඨ දක්‌වමින් රජයේ වෛද්‍ය නිලධාරීන්ගේ සංගමය සිදු කරන ලද වැඩ වර්ජනයේ කිසිදු සාධාරණත්වයක්‌ නැතැයි සෞඛ්‍ය, පෝෂණ හා දේශීය වෛද්‍ය ඇමැති රාජිත සේනාරත්න මහතා කියා සිටී.
ඇමැතිවරයා මෙසේද කීවේය.
මෙම වැඩ වර්ජනයට එක්‌ හේතුවක්‌ ලෙස ඔවුන් දක්‌වා ඇත්තේ වෛද්‍යවරුන් වෙත පනවා ඇති සියයට 12 ක්‌ව පැවැති දේශීය ආදායම් බද්ද සියයට 24 දක්‌වා වැඩිකර ඇති බවයි. නමුත් දේශීය ආදායම් බද්ද සියයට 24 දක්‌වා අයකර ගනු ලබන්නේ මාසිකව රුපියල් තුන්ලක්‌ෂ පනස්‌දහසකට වඩා ආදායමක්‌ ලබන වෛද්‍යවරුන්ගෙන් වන අතර මාසික ආදායම රුපියල් තුන්ලක්‌ෂ පනස්‌දහසකට අඩු ආදායම් සහිත වෛද්‍යවරුන්ගෙන් අයකර ගනු ලබන්නේ පෙර පැවැති සියයට 12 ක බද්ද පමණකි. සමස්‌ත වෛද්‍යවරුන්ගෙන්ම සියයට 24 ක ආදායම් බද්දක්‌ අයකරනු ලබන බව සාවද්‍ය ප්‍රකාශයකි.
අනෙක්‌ හේතු ලෙස ඔවුන් දක්‌වන්නේ පෞද්ගලික රෝහල් සඳහා පනවා ඇති සියයට 15 ක වැට්‌ බද්ද හේතුවෙන් ජනතාව මත බදු බර පැටවෙන බවයි. නමුත් පසුගිය මාසයේ සිට පෞද්ගලික රෝහල් සඳහා පනවා ඇති වැට්‌ බද්ද සම්පූර්ණයෙන්ම ඉවත් කළා. මෙසේ පෞද්ගලික රෝහල් සඳහා වූ වැට්‌ බද්ද ඉවත් කර ඇති බව සෞඛ්‍ය සේවාවේ ප්‍රමුඛ වෘත්තිය සමිතියක්‌ නොදැන සිටීම කනගාටුවට කරුණකි. පෞද්ගලික රෝහල් මත පනවා ඇති වැට්‌ බද්ද සම්පූර්ණයෙන්ම මෙම රජය විසින් ඉවත් කර ඇති නිසා කිසිදු ආකාරයකට රෝගීන්ගෙන් බදු අය නොකරන බව මතක්‌ කර දිය යුතුය. එම නිසා මෙම වැඩ වර්ජනය කිසිදු ආකාරයක ජනතාව ගැන සිතා කරන සාධාරණ වර්ජනයක්‌ නොවෙයි.
ඉදිරියේ දී රජය සාමාන්‍ය ජනතාව මත බලපාන වක්‍ර බදු ඉවත් කිරීමටද තීරණය කර තිබෙනවා. මෙසේ සාමාන්‍ය ජනතාවට බලපාන වක්‍ර බදු ඉවත් කරන්නේ අධි ආදායම්ලාභීන් ගෙන් බදු අයකර ගෙන යෑයිද අමාත්‍ය රාජිත සේනාරත්න මහතා වැඩිදුරටත් කීවේය.