රිය අනතුරක් සිදුකර පුද්ගලයෙකු මරණයට පත් කිරීම සම්බන්ධයෙන් ක්‍රිකට් ක්‍රීඩක කුසල් මෙන්ඩිස්ට එරෙහිව ගොනුකර ඇති නඩුව අද (24) පානදුර මහේස්ත්‍රාත් අධිකරණයේදී විභාගයට ගැනිණි.

නඩුව විභාගයට ගත් අවස්ථාවේදී සැකකරු වෙනුවෙන් පෙනී සිටි නීතිඥයන්ගේ කරුණු දැක්වීම අනුව අධිකරණය භාරයේ තිබූ කුසල් මෙන්ඩිස්ගේ රියදුරු බලපත්‍රය රුපියල් 50,000 ක ඇප මුදලකට යටත්ව නිදහස් කිරීමට පානදුර අතිරේක මහේස්ත්‍රාත් චන්දන කලංසූරිය මහතා තීරණය කළේය. ඒ සැකකරුට දැඩි අවවාද කිරීමෙන් අනතුරුවයි.

මිලියන 20 කට අධික ජනතාවක් සිටින රටේ ජාතික ක්‍රිකට් කණ්ඩායමට සුදුසුකම් ලබන්නේ ඉතා අතළොස්සක් පමණක් බැවින් අනෙක් අය අපහසුතාවයට පත් නොවන ආකාරයෙන් කටයුතු කරන ලෙසත් සියලු දෙනාටම ආදර්ශමත් ලෙස හැසිරෙන ලෙසත් අතිරේක මහේස්ත්‍රාත්වරයා අවවාද කර තිබෙනවා.

මරණයට පත් වූ පුද්ගලයා වෙනුවෙන් වන්දියක් ලබා ගැනීමට අපේක්ෂා කරන්නේ නම් ඒ සඳහා වෙනම නඩුවක් ගොනු කරන ලෙස අගතියට පත් පාර්ශ්වයට දැනුම් දුන් අතිරේක මහේස්ත්‍රාත්වරයා වැඩිදුරටත් සඳහන් කළේ නීති සහාය ලබා ගැනීමට අවශ්‍ය නම් ඒ සඳහාද අවස්ථාව තිබෙන බවයි.